Le vaL-d'esnoms
^Poésie

◎ Ballade des Dames du temps jadis

Dictes-moy où, n'en quel pays,
Est Flora, la belle Romaine ;
Archipiada, née Thaïs,
Qui fut sa cousine germaine ;
Écho, parlant quand bruyt on mène
Dessus rivière ou sus estan,
Qui beauté eut trop plus qu'humaine ?
Mais où sont les neiges d'antan !

Où est la très sage Heloïse,
Pour qui fut chastré et puis moyne
Pierre Esbaillart à Sainct-Denys ?
Pour son amour eut cet essoyne.
Semblablement, où est la Reyne
Qui commanda que Buridan
Fust jeté en un sac en Seine
Mais où sont les neiges d'antan !

La royne Blanche comme un lys,
Qui chantoit à voix de sirène ;
Berthe au grand pied, Biatris Alix ;
Harembourges, qui tint le Mayne,
Et Jehanne, la bonne Lorraine,
Qu'Anglois bruslèrent à Rouen ;
Où sont-ilz, Vierge souveraine?
Mais où sont les neiges d'antan !

ENVOI

Prince, n'enquérez de semaine
Où elles sont, ne de cest an,
Que ce refrain ne vous remaine:
Mais où sont les neiges d'antan !

^{François Villon}